Police perso : Cristiani Corsi: FRATELLI CORSI
Drop Down MenusCSS Drop Down MenuPure CSS Dropdown Menu

mercredi 22 octobre 2014

FRATELLI CORSI

 Discorsu  prununziatu da u prufessore  Antone  Luciani  à a manifestazione cuntr'à u PISS CHRIST u 6 di sittembre  2014




Simu radunati qui’, oghje, cum’e no fummu u 26 d’aostu, e per listesse ragioni : per prutestà. Ind’a città imperiale, ind’un Museu chi porta u nome d’un Cardinale, ziu di L’Imperatore una sperta mette in tronu, a cantu atanti risi d’arte di a pittura taliana, un’opera sporca, sconcia, chi raprisenta un Cristu intintu ind’e l’urina.

Cristiani chi no simu, ci sentimu inghjuliati. In nisun paese, in nisuna cultura, un s è mai vistu l’Arte ghjuca à a risa i sintimi di u populu. Noi rispettemu l’opinioni d’ognunu ; intendimu dunque chi l’altri rispettinu e nostre. Hanu imbavacciulatu a nostra fede ; ci rivultemu.
Corsi chi no simu, ci sentimudino’ inghjuliati. Qual’é u Corsu chi suppurteria chi u so babbu o a so mamma sienu ghjucati à a pacchjera cun tanta superbia ? S’ellu ci n’é unu ch’ellu si facci avanti ! Tutta a nostra storia è impastata di cristianesimu ; u Dio vi salvi Regina è un cantu in l’onore di a Vergine Maria, ma è dino’ l’innu naziunale di a nazione corsa, sceltu da i nostri antichi in 1735, e un n’é a casu si a nostra festa naziunale casca l’ 8 di dicembre. Qual’è quellu chi rinnegherà i vistuti di pilone chi ci hanu fattu cio’ chi no simu e u so sangue corre ind’e nostre vene ? Saremu cusi’ avvigliacchiti da lascià ghjente scaturita da qual’é chi sa duve vene a stupacci in bocca in casa nostra, per pagà di a nostra ospitalità ?
Tutti dunque, credenti o non credenti, ci chiamemu offesi ; Offesi da quelli chi hanu organizatu ssa sperta, e da quelli chi l’hanu lasciati fà : quessi un’hanu l’anima corsa.
Dicenu, per ghjustificassi, chi l’Arte un si po intravà. Falzi e buggiardi !
Femmu chi una bellissima ajaccina - una di quelle chi si volenu muderne- e ammiratrice di u nostru geniu pisciulosu, li dumandi di falli u so ritrattu, e chi quellu, a modu soiu, faccia un fior di carne intintu ind’i l’urina : chi diceria a nostra capivana ? Ma chi tanta libertà di l’Arte ! Si senterianu i mughj, e cacceria l’occhj a u caru pittore.


 In quant’a u nostru pinnellu purcinu, ellu pretende, cun voce sulenne, chellu cerca Diu... Bella manera di circallu ! E meraculu ch’ellu un l’abbia ancu trovu ! Dopu trent’anni ch‘ellu u cuttighjeghja... Li deremu un cunsigliu : ch'ellu cerchi Allah, pinghjendu cu i pedi inguazzati ind’u strecu : u truverà subitu subitu. Curaggiosu, u nostru liberu pittore , «ma non troppo».
Quessa un’é arte, é sfida. A chi ci cerca ci trova. Cum’e di solitu, da Corsi, rispundimu à a sfida, e simu qui’. E intendimu ch’ella ci esci di razzica l’opera infama, o per lu menu ch’ella sia messa a u so locu naturale : a latrina.
Qui’ piglia l’abbriu a resistenza corsa, e, da oghje in poi, stenderà u so volu. D’infatti stemu vivendu - ma qual’é chi si n’accorge ? - a più tremenda mutazione di a storia umana : una putenza senza visu e senza voce, ma spaventosa, s’é impadrunita di u nostru mondu, e s’adopra a ghjunghje à u so fine. Simu à l’epuca detta « post-muderna » o « post-umana», vale a di’ : di a morte di l’ommu ; prova ne é u prugettu di Peillon : piglià i ciucci tempu nati, purtalli sempre lattenti ind’e so scole, pe’ sradicalli di nettu. Ne mancu a negà, a face à palesu. Li vole toglie ogni specificità, di razza, famiglia, cultura, tradizione, nazione. E, ben intesu, fanne tutti mascifemmine. In corte parolle, di Natura, chell’un ne fermi mancu stampa ! E a gran rivolta contr’a tuttu u creatu. Sognu pazzu, natu da un orgogliu luciferianu. Noi sapemu chi l’ommu « post-umanu » un po esse che l’ommu inumanu. E ci rivultemu.
I nostri antichi avianu ghjustificatu a so rivolta cun argumenti tratti da San Tumasgiu, u Duttore angelicu. Ma chi diceria oghje San Tumasgiu ? Chi a nostra rivolta è mille volte di più ghjustificata : un si tratta più di a liberazione d’un populu oppressu ; si tratta di l’esistenza di l’ommu. A lutta deve dunque esse radicalizzata, vale a di’ ricundutta a e so radiche, chi so spirituali E quella di u Bè contr’a u Male, di a Luce contr’a a Tenebra, di a Civiltà contr’a a Barbaria, di a Vita contr’a a Morte. Insurgimentu di e cuscienze ; e summossa di u populu. Guerra ghjusta e santa da Diu benedetta.
C’é chi dice chi no un puderemu regge, chi a vigata infernale sovrumana si ne purterà tuttu. Guardendusi in giru, un vedenu che corruzione, viltà e tradimentu. E s’ammorbanu, e a mestizia l’adonda ; Ma li rispundimu : un vi perdite d’animu. E bughju, ma é u bughju di l’alba. Arradicata in fondu a l’addisperu, spunta e cresce u salvamentu. E ci sustene a figura imblematica di e rivolte corse : micca un qualunque Che Ghevara americanu, ma u nostru Circinellu, Prete Leca, Curatu di Guagnu, ch’elli truvonu mortu ind’una sapara,infumaticatu cum’e una selvaticina ind’a so tana, cu un stilettu ind’una manu, e ind’i l’altra un crucifissu, ch’ellu s’avia postu nant’a e labbre. U Santu e l’Eroe, u Vir Nemorum (U Banditu) cantatu da Nobili Savelli, chi fù studiente di l’Università paolina, ind’un splendidu puema latinu. Ch’ellu sia a nostra stella guida d’un’indomita resistenza. Noi, unn alzeremu mai a stela di a sottumissione.
Sott’a e cennere e braci di l’amor patriu so’ sempre accese ; oghje, venutu da l’altu celu, un soffiu di santa libertà a sprigiunatu una fiamma diritta, alta e pura, chi mai si spegnerà.

Arritti, i Corsi !

Aucun commentaire:

Enregistrer un commentaire