MESSA NUSTRALE , MEMORIA NAZIUNALE

Stu 14 di lugliu , i patriotti corsi assistavanu à a Santa Messa celebrata in lingua nustrale da u prete Boccheciampe è cantata da u gruppu Madricale , per u cunventu San Antone di a Casabianca .
Di a Corsica sana, i figlioli di a Nazione sò venuti dinù da fà campà u ricordu di l'elezzione di u caru Pasquale Paoli  Capigenerale a Nazione.

Umelìa detta nu mentre di a Santa Messa :

 Beati quelli chi so persecutati per via di a ghjustizia, chì u reame di u celu hè soiu.
È quellu chì derà solu un bichjeru d'acqua fresca à unu di sti chjuchi perch'ellu hè u mio dicipulu, a vi dicu in verità, ùn perderà a so recumpenza.
Eccu cari fratelli è care surelle e parulle di Ghjesù. Oghje simu in stu locu stroricu ma dinù sacru per via di cio ch'ellu si passò u 14 lugliu 1755, cù u babbu di a nostra patria. Celebremu issa messa in ricordu di l'antichi ma dinu pè onorà a memoria di quelli chì pensavanu una Corsica piena di ghjustizia e di Spartera. Simu quì pè precà inseme in stu cunventu di Sant'Antone di a Casabianca chì cum´è u cunventu San Francescu d'Orezza un funu micca scelti à l'azardu.
Noi Corsi Cristiani dipoi seculi è seculi pruvemu di caminà nant'à a  strada insignata da un nostru Signore, oghje simu in perdita di sti puntelli, ci scurdemu di l'insignamentu sacru, ci scurdemu di u chjassu chjaru ch'ellu ci ha insignatu Ghjesù Cristu. Simu quì dinù perchè ùn vulemu cappià i bracci perchè cridimu sempre à sta parulla d'amore è di sperenza, per una vita più sana ma dinù per una Corsica chì si ritrova in li so veri valori.
I valori di quelli chi 259 anni passati anu illuminatu u mondu quelli chì ci aprianu e porte di a libertà à di l'ugualità. Cuntinuemu à sperà, un capiemu nunda, simu i figlioli di sta terra innaquata di lacrime e assuata di tanti sacrifizii, femula pè e generazione à vene cun sempre a parulla di u vangelu per sola lege.
È cusì sia !